نداء ورجاء واستغاثه الى مدير شمال الدقهليه ورئيس مجلس اداره البريد المصرى

اليوم هدد زميل زميل له فى العمل على سلم المنطقه بالمطواه وفتح راسه اثناء تهريجهم لبعض
وقال له مفيش حد فى المنطقه هيقدر يعمل حاجه
هما يعنى كانوا عملوا ايه مع ا/محمد مكاوى عندما فتح راس ا/جمال بتاع الامن ولا حاجه وكمان هنصتلح فى مكتب المدير
ارجوك يا ا/ جمال عثمان اتخذ موقف الموضوع هيكبر مما تتصور

اليوم ايضا حصلت كارثه بكل المقايس وسببها الاهمال والتراخى
اليوم وفى الساعه 11.45 صباحا قرر العمال (السعاه) ان يقوموا بتنزيل شغل اللامركزية التوفير الموجوده فى الدور الرابع وهذا الشغل معبأ فى شكاير ومن المتعارف عليه من ايام ا/مصطفى الريالى المدير السابق ان هذه الشكاير علشان تنزل يتم رميها وحدفها من شباك الدور الرابع الموجود بجوار المطافى سابقا على الارض
واليوم فيه صرف معاشات وزحمه وكانت المفاجاه السيئه فى وقت الرمى والحدف الشكاير من الدور الرابع
اذا برجل كبير السن يتعدى عمره 75سنه تقع عليه شيكاره من هذه الشكاير وسقط على الارض فى التو واللحظه نتج عن ذلك كسر العمود الفقرى له ونزيف داخلى0
ومن المعروف عندنا ان مديرين الاداره يتميزوا بالشهامه والرجوله لذلك تم اصدار التعليمات والاوامر بدخول الشكاير داخل المنطقه على الفور
وتفسيرهم للموقف ان هذا هو قضاء الله
وتم هروبهم من اجل عدم تحمل المسئوليه
وتم ابلاغ الاسعاف من طرف بعض الاشخاص وذهب الى المستشفى 0
مين يرضى بهذا
كان من الممكن ان يكون هذا الشخص هو انت -اخوك- والدك- صحبك
يا جماعه والله العظيم حرام حرام حرام
لابد من حساب من يخطئ اينكان0
انا لست ضد ا/جمال عثمان فانا اعرفه جيدا وله منى كل احترام
ولكن المنطقه فيها تسيب واهمال من ايام المدير السابق الريالى لذا
على ا/جمال المدير العام محاسبة كل من يخطئ اينكان
هذا اهمال ادى الى كسر عمود فقرى لعميل ونزيف داخلى له وكان من الممكن ان يؤدى الى وفاته
تعدى ا/محمد مكاوى على ا/جمال مسئول الامن بزجاجه ادى الى فتح راسه وحاجبه كان من الممكن يؤدى الى فقدان حياته
ارجوك محاسبة المخطئين
من راى منكم منكرا فليغيره
نحن فى عمل وشغل لسنا فى حلقات مصارعه
وياريت مفيش حد يقولى صلح وكلام من ده
المحاسبه المحاسبه المحاسبه والمجزاه اى ينكان المخطئ حتى لا يتكرر ذلك مره اخرى
لو تعدى موظف على موظف فى مكتب كان سيتم التحقيق معه ومجازاته ونقله
وياريت انا لو بتكلم كلام حرام او عيب حد يعرفنى

[b]

الزميل /الباشا تلميذ
الموضوع هدفه اننى برجو وانادى المدير العام بمحاسبة المخطئين مهما كانت وظيفتهم

وحضرتك يااخ ريكو لما انت انسان كويس وبتطالب بالتغيير طيب ما تكتب اسماء الزملاء دول وبعدين انت كان موقفك ايه لما شوفت الموقف ده عملت ايه طبعا روحت وقولت الحق واكتب على النت طيب لعلم سيادتك المدير العام كان طول اليومفى اجتماع وع رؤساء المجموعات وحضره اكثر من مدير ادارة ركز بالله عليك وبلاش الغل اللى جواك كفاية بقى وبعدين المكان اللى عند المطافى سابقا الى عند الباب القديم العملاء مش بيروحوا هناك لان مافيش هناك لاباب ولاشباك تعامل يا ابن الحلال اهدأ بقى والله العظيم انت صعبان دا انت يا عينى ما لحقتش تتغدى وكتبت الموضوع على طول ايه انت كنت مزوغ ولا ايه ا/ جمال عثمان والله العظيم احسن مليون مرة من الناس دى اللى الواحد فيهم مايعرفش حتى يمشى على اتنين بس دا اذا كان بيقدر يمشى على مراته يابن كفاية بقى الكلام ده مش ها يؤثر على ا/ جمال عارف ليه لان ربنا سبحانه وتعالى ولله المثل الاعلى لحد دلوقت لسه فيه ناس بتكفر بيه سبحانه وتعالى وبعدين انت بتحب الاستاذ جمال وبتحترمه ماتدخل عليه مكتبه وتقوله كل السلبيات والراجل بيسمع لاى حد ايا كان مستواه الوظيفى بالله ارحم نفسك بقى ياراجل دا انا تعبت لك سلف والله

الزميل العزيز ريكو:كلامك مخيف ويدل على ان الادارة فى شمال الدقهلية تحتاج لكثير من الحزم والانضباط والشدة فى تطبيق التعليمات تماما كما يتم التعامل به مع موظفى المكاتب((هذا ان كان ما قلته صحيحا))
لو كان هذا حدث بين اثنين من موظفى المكاتب لقامت الدنيا ولم تقعد ،،ولكن يبدو أن موظفى الادارة فوق القانون!!! ولكن لمزيد من المصداقية يرجى كتابة أسماء الاثنين الذين قاموا بالتهريج مع بعض بالمطواة حتى لا يقوم المدافعين عن الادارة ورجالها بالنفى والتكذيب كعادتهم..
وبالنسبة للأخ الزعيم 22 أنت دائما ترد وتحاول تحسين صورة المدير والادارة ولا تدخل مباشرة فى صلب الموضوع بمعنى ما الفائدة من طلبك لريكو أن يذكر أسماء الاشخاص فى الواقعة وانت لم تنفيها صراحة ولم تؤكدها طبعا؟
ثانيا هذه الواقعة لا ينفى مسؤوليةا/ جمال عنها كونه فى اجتماع طول اليوم فوكلاء المكاتب الذين لا يتميزون بأى ميزة مادية أو معنوية مسؤولين عن نظافة المكان سواء كان هناك عامل فى المكتب أو لا،،ومسؤولين عن تأمين المكاتب سواء كانت الحراسة موجودة أو لا،،ومسؤولين عن تأدية الخدمات للجماهير سواء توفرت القوة الوظيفية أو لا،،ومسؤولين عن تأدية الاعمال على أكمل وجه سواء توفرت مقومات العمل بالمكتب أو لا،،فمن المسؤول الان عن مثل هذه التجاوزات ..أنا شخصيا أرى أن الزميل ريكو لا يهاجم ا/ جمال لشخصه ولا يستخدم ألفاظ خارجة إنما ينتقد أوضاع تستحق النقد فعلا،،
أما الاخ حق البريد فشمال الدقهلية تحتاج رجالة فعلا ولكن رجالة من المكاتب فى المقام الاول لأنهم هم أصحاب النصيب الاكبر فى البهدلة والاهانة وضياع الحقوق سواء من الجمهور أو من الادارة وموظفيها (إلا من رحم ربى فلكل قاعدة شواذ طبعا)أكرر ثانية لا بد من الاتحاد والتكاتف لنكون قوة قوية تدفع بمدير المنطقة نحو تحقيق ما يحاول الوصول اليه من تحقيق العدالة والاستقرار بالمنطقة وللضرب بيد من حديد على كل من تسول له نفسه أن ينتقص من قدرنا،ونحن نبدأ الان فى منية سمنود بالفعل تكوين رابطة للبريديين لأبناء منية سمنود ((وخارجها طبعا)) لتكوين مثل هذا الاتحاد وسنكون بإذن الله مختلفين عن كل ما سبق وانا فى انتظار كل البريديين فى الدقهلية

b]زملائى الاعزاء وبالخصوص الزميل /الزعيم 22
انا لست ضد ا/جمال عثمان المدير العام
ولكنى انتقده فى بعض التصرفات
وذلك النقد من اجل البناء وليس الهدم معاذ الله
فتعدى مدير اداره /محمد مكاوى على ا/جمال مسئول الامن ليس امرا سهلا كما ذكرت انت وفتح راسه وحاجبه دون اتخاذ اى اجراء من قبل الاداره فلابد من تنفيذ التعليمات على اى موظف مهما كان ام ان هذه التعليمات تنفذ على موظفى المكاتب والاداره لا فهذه حياة بشر
2- نتيجة الاهمال فى الاداره ووقوع شيكارة شغل على رجل عمره يتعدى 75سنه مما احدثت عنده نزيف داخلى وكسر العمود الفقرى ليس امرا سهلا فهذه حياة بنى ادمين كان من الممكن ان يكون والدك انت فلابد من معاقبة المسئول
وصفك لى بانى عندى غل معاذ الله ان اكون هكذا
وليحاسبك الله
فانا اذكر حقائق تمت بالفعل فى الاداره ولا احد ينكرها

ولا بد من محاسبة المخطئ[/b]

على فكرة الاتنين اللى كانوا بيتخانقوا بالمطاوى سائقى تاكسى امام المنطقة والكل شايف كده عرفت ليه يا اخ (حر من شمال الدقهلية) انا باقول للاخ ريكو اذكر الاسماء بس السلام عليكم

[b]ادارة شمال الدقهلية ضعيفة جدا و سوف يسود جو من البلطجة و عدم الاحترام للؤساء و ان غداا لناظره قريب

و ادلع يا توحيد براحتك لما تجيلك من فوووق ان شاء الله وانت اللى تمشى
و براحتك يا جمال يا ضعيف شوفلك منطقة على قدك ادارى فيها وخلص الكلااام[/b]

حر من شمال الدقهلية كتب:
أما الاخ حق البريد فشمال الدقهلية تحتاج رجالة فعلا ولكن رجالة من المكاتب فى المقام الاول لأنهم هم أصحاب النصيب الاكبر فى البهدلة والاهانة وضياع الحقوق سواء من الجمهور أو من الادارة وموظفيها (إلا من رحم ربى فلكل قاعدة شواذ طبعا)أكرر ثانية لا بد من الاتحاد والتكاتف لنكون قوة قوية تدفع بمدير المنطقة نحو تحقيق ما يحاول الوصول اليه من تحقيق العدالة والاستقرار بالمنطقة وللضرب بيد من حديد على كل من تسول له نفسه أن ينتقص من قدرنا،ونحن نبدأ الان فى منية سمنود بالفعل تكوين رابطة للبريديين لأبناء منية سمنود ((وخارجها طبعا)) لتكوين مثل هذا الاتحاد وسنكون بإذن الله مختلفين عن كل ما سبق وانا فى انتظار كل البريديين فى الدقهلية

https://www.facebook.com/#!/groups/224611230984823/